मुंबई, दि.०६ [प्रतिनिधी] :- जनतेच्या विविध प्रश्नांसाठी सदैव तत्पर असलेल्या माजी मंत्री तथा आमदार सुधीर मुनगंटीवार यांच्या कार्यकुशलतेची प्रचिती सध्या सुरू असलेल्या अर्थसंकल्पीय अधिवेशनात पुन्हा दिसून आली. समाजवादी पार्टीचे आमदार अबू आजमी यांनी केलेल्या औरंगजेबाच्या उदात्तीकरणाचा विषय असो, शेतकऱ्यांच्या नुकसान भरपाईचा विषय असो अथवा सरकारवर विरोधकांनी केलेल्या कोणत्याही हल्याचा विषय असो सुधीर मुनगंटीवार यांनी आपल्या अभ्यास पूर्ण धारधार उत्तर रूपी प्रतिहल्यातून सरकारची प्रतिमा, सरकारची साख वाचवल्याचे पहावयास मिळाले.
तसेच त्यांनी शेतकरी, कामगार यांच्या न्यायासाठी उपस्थित केलेल्या लक्षवेधी ही ‘लक्षवेधी’ ठरल्या. ताडाळी जिल्हा चंद्रपूर येथील धारीवाल इंफ्रास्टक्चर या कंपनीमध्ये अपघातामुळे कामगार दगावल्याची घटना घडल्या. या संदर्भात कामगारांच्या सुरक्षेचा प्रश्न उपस्थित करीत आमदार सुधीर मुनगंटीवार यांनी लक्षवेधीच्या माध्यमातून सभागृहाचे लक्ष वेधले. लक्षवेधीवर कामगार मंत्री आकाश फुंडकर यांनी उत्तर दिले. या उत्तरात त्यांनी चंद्रपूर येथील कंपनीतील अपघातात सुरक्षेच्या दृष्टीने खबरदारी घेण्यात आली नसल्याचे मान्य केले. त्यांनी यासंदर्भात औद्योगिक सुरक्षा व आरोग्य संचालनाच्या अधिकाऱ्यांमार्फत चौकशी करण्यात आल्याचेही सांगितले.
आमदार सुधीर मुनगंटीवार यांनी कामगार बांधवांची सुरक्षा महत्वाची असून त्यासाठी राज्य सरकारने कडक कायदे करणे आवश्यक असल्याचे मत व्यक्त केले. अपघातात जीव गमावलेल्या कामगारांना आर्थिक मदतीसाठी भारतीय मजदूर संघाला आंदोलन करावे लागल्याचेही त्यांनी सांगितले. कामगारांच्या सुरक्षेबाबत होत असलेला हलगर्जीपणा थांबविण्यासाठी या विषयावर बैठक घेत सविस्तर चर्चा करण्याची गरज आहे, असे नमूद करीत श्री. सुधीर मुनगंटीवार यांनी कामगार मंत्री श्री. आकाश फुंडकर यांना चंद्रपूर येथे आमंत्रित देखील केले.
