चंद्रपूर, दि. २८ [प्रतिनिधी] :- चंद्रपूर जिल्ह्यातील संजय गांधी निराधार आणि श्रावणबाळ योजनेअंतर्गत अनेक लाभार्थ्यांचे अनुदान अद्यापही प्रलंबित आहे. त्यामुळे चिंतेने ग्रासलेल्या निराधारांनी राज्याचे मा. वने व सांस्कृतिक कार्य मंत्री सुधीर मुनगंटीवार यांच्याकडे याबाबत कैफियत मांडली. त्यास प्रतिसाद देत सुधीर मुनगंटीवार यांनी निराधार लाभार्थ्यांचे सर्व प्रलंबित अर्ज तातडीने निकाली काढण्याचे निर्देश जिल्हा प्रशासनाला आज दिले.
जिल्हाधिकारी कार्यालयातील २० कलमी सभागृहात आयोजित बैठकीत त्यांनी, “राज्य शासनाने निराधार योजनेतील लाभार्थ्यांना नोव्हेंबर २०२४ पर्यंत ऑफलाइन स्वरूपात अनुदान वितरित केले होते. मात्र, डिसेंबर २०२४ पासून ऑनलाइन वितरणाला सुरुवात झाली आहे. चंद्रपूर जिल्ह्यात संजय गांधी निराधार योजनेचे एकूण ६२ हजार २०४ लाभार्थी आहेत. तर श्रावणबाळ योजनेचे ०१ लक्ष ०७ हजार १७५ लाभार्थी आहेत. १५०० रुपया मागे केंद्र शासनाचे ३०० रुपये चार महिन्यापासून अप्राप्त आहेत. हे गतिमान प्रशासनाचे प्रमाण नव्हे.” अशा शब्दांत नाराजी व्यक्त करत याकडे प्रशासनाने लक्ष वेधले.
मुल तालुक्यातील २३६ लाभार्थ्यांची प्रकरणे निकाली काढण्यात आली असून फेब्रुवारी २०२५ अखेरपर्यंत १७८ अर्ज निकाली काढण्यात आले आहेत. बल्लारपूर येथे २०४ तर चंद्रपूर शहरातील १३०० अर्ज प्रलंबित आहेत. ते अर्ज त्वरित निकाली काढण्यासाठी प्रशासनाने कार्यवाही करावी, असे निर्देश आमदार मुनगंटीवार यांनी दिले. बल्लारपूर, मुल, पोंभुर्णा आणि चंद्रपूर शहरातील निराधार आणि श्रावणबाळ योजनांच्या लाभार्थ्यांना वेळेवर अनुदान मिळावे यासाठी प्रशासनाला गतिमान कार्यवाही करण्याचे निर्देश आमदार सुधीर मुनगंटीवार यांनी दिलेत.
जानेवारी २०२५ पर्यंत ८८ हजार ६५५ लाभार्थ्यांपैकी ५६ हजार ४२२ लाभार्थ्यांचे अनुदान त्यांच्या बँक खात्यात जमा करण्यात आले आहे. मात्र ३२ हजार २३३ लाभार्थ्यांचे बँक खाते आधार संलग्न नसल्याने त्यांना अनुदान मिळू शकलेले नाही. राज्यातील संजय गांधी निराधार योजनेच्या नव्या धोरणांची आखणी करणे आवश्यक असल्याचे आमदार मुनगंटीवार म्हणाले. यावर १०० दिवसांच्या कृती कार्यक्रमांतर्गत मार्च २०२५ अखेरपर्यंत सर्व प्रलंबित अर्ज निकाली काढले जातील, असे जिल्हाधिकारी विनय गौडा यांनी आश्र्वस्त केले. या बैठकीला जिल्हाधिकारी विनय गौडा, भाजपा महामंत्री डॉ.मंगेश गुलवाडे,तहसीलदार सीमा गजभिये, छबुताई वैरागडे, शालुताई कुंदोजवार, साक्षीताई कार्लेकर आदींची उपस्थिती होती.
निराधारांच्या पाठीशी सदैव!
सुधीर मुनगंटीवार यांनी आमदार असताना विधानसभेत निराधारांसाठी ठामपणे आवाज उठवला होता. अर्थमंत्री झाल्यानंतर त्यांनी निराधारांना मिळणाऱ्या ६०० रुपयांच्या अनुदानात वाढ करून ते १२०० रुपये केले. पुढे राज्य सरकारने यामध्ये अधिक वाढ करत अनुदान १५०० रुपये पर्यंत केले. सुधीर मुनगंटीवार हे नेहमीच निराधारांच्या पाठीशी ठामपणे उभे राहत आले आहेत. त्यामुळे निराधारांचा प्रलंबित अनुदानाचा हा प्रश्न ही सुधीर मुनगंटीवारच सोडवू शकतील असा विश्वास यावेळी निराधार लाभार्थ्यांनी व्यक्त केला.
